Shiikha Calaamaha ahaa ee Maxamed Nasiru-Diin Alalbaani Wuxuu ka mid ahaa Culimada ugu waawayn Muslimiinta Casrigan cusub,waxana loo haystaa Shiikh Alalbaani inuu ahaa Culimada Xadiithka ee waawayn ee ku keliyaystay Cilmiga loo yaqaano Aljarax Watacdiil (الجرح والتعديل) ,Shiikh Alalbaani Wuxuu ahaa Xujo xaga Cilmiga Musdalaxa Xadiithka waxayna ka yidhaahdeen isaga Culimada Muxadithiinta ahi Wuxuu dib u soo celiyay Casrigii Ibnu Xajar Alcasqalaani, Xaafid Ibnu Kathiir iyo qayrkood oo ah Culimadii Cilmiga Aljarax Watacdiil

Wuxuu dhashay Shiikh Maxamed Naasiru-Diin Bin Alxaji Nuux Alalbaani Sanadkii 1333h oo waafaqsan Sanadkii 1914m wuxuuna ku dhashay Magaalada Ashkodarah oo markaa ahaan jirtay Caasimadii Dowlada Albaaniya,Wuxuu ka dhashay Qows faqiir ah oo Ahlu Diin ah oo uu ku badnaa ama lagu yiqiinay Cilmiga,Aabihii Wuxuu ahaan jiray kay Dadku u noqdaan oo wax bara oo hanuuniya

Waxa uu u haajiray Shiikhu isaga oo Aabihii la socda ilaa iyo Dimishiq oo Shaam ah (Suuriya) si uu halkaa u dego si daa’im ah ka dib markii uu wadadii Islaamka ka leexday Axmed Ragu Boqorkii Albaaniya waqtigaa ee uu u weeciyay Wadankiisii xaga Xadaarada Reer Galbeedka ee Cilmaaniga ah

Waxa uu ku dhamaystay Alcalaamah Shiikh Alalbaani waxbarashadiisii hoose Dugsiga Aliscaaf Alkhayri oo ku yaala Dimishiq isaga oo ahaa ardaydii ugu saraysay natiijadii Imtixaanka ee Dugsigaa

Wuxuu ka qaatay Aabihii oo ka bartay Mihnada ah Saacada samaynta aadna waa u bartay oo waa ku soo baxay ilaa uu ka mid noqday dadka ugu caansan ee Saacadaha samaya,wuxuuna ka kasban jiray Risiqiisa oo waa ku shaqaysan jiray,wuxuuna ka helay oo ay u sahashay Mihnadatanu inuu u helo waqti wanaagsan oo uu wax ku barto waxna ku aqristo,waxayna u suura gelisay hijradiisii uu ku tegay Shaam Aqoonta iyo barashada Afka Carabiga iyo inuu ka daalacdo oo ka barto Culuumta Sharciga ah Masdaradeeda Asliga ah

Waxay taasi u noqotay Shiikh Alalbaani Fure khayr oo wayn iyada oo uu noqday ihtimaamkiisii Xadiithka iyo Culuumtiisu Shaqadiisa shaqaynaysa oo uu sidaas darteed maruuf kaga noqday Ahalka Cilmiga dhexdooda ee Dimishiq ilaa ay gaadhay in Idaaradii Maktabada Adaahiriya (مكتبة الطاهرية) ee Dimishiq u samaysay Qol gaar u ah si uu halkaa ugu sameeyo Baadhitaanadiisa Cilmiga ah ee faa’iidada leh waxa kale oo taas ka sokow la siiyay Nuskhad ah Muftaaxii Maktabada si uu u furto oo u galo waqti alaale iyo waqtigii uu doono, xaga se alifaada iyo tasniifta Wuxuu bilaabay 20jir kiisii waxayna ahayd Mu’alafaatkiisii Fiqhiga ahayd ee ugu horeeyay ee ku dhisnaa Aqoonta iyo Daliilka iyo Fiqhiga barbardhiga ah Kitaabka la yidhaahdo: taxdiir asaajid min itikhaad alqubuur masaajida (تحذير الساجد من إتخاد القبور مساجد) waana la daabacay marar badan,iyana waxay ahayd kuwii ugu horeeyay ee ahaa soo saaritaanka Xadiithka manhajiga ah isna Kitaabka la yidhaahdo: arowd anadiir fii tartiib wa takhriij mucjam adabaraani asaqiir (الروض النضير في ترتيب وتخريج معجم الطبراني الصغير) ilaa hadana lama daabicin

Waxay ahayd ku hawlanantii Shiikh Alalbaani ee Xadiithka Rasuulka sala Allaahu calayhi wasalam mida ku yeelatay saamaynta wayn in uu noqdo Shiikhu Salafi ah waxana sii kordhiyay ku dheganaantiisa iyo ku sugnaantaa Manhajkaa aqriyistii iyo daalacashadiisii Kutubtii Shiikh Alislaam Ibn Taymiyah iyo Ardaygiisii Ibnu Alqayim iyo qayrkoodba Culimadii Dugsiga Asalafiyah.

Waxa uu qaaday Shiikh Alalbaani Calankii Dacwada Towxiidka iyo Sunnaha ee Suuriya wuxuuna soo booqday Mashaa’iikh badan oo ku sugnaa Dimishiq markaas waxaana dhex martay falanqayno ku saabsan arimaha Towxiidka,Raacitaanka,Tacasubka Madhabnimo iyo Bidcada wuxuuna taas kala kulmay Shiikhu mucaaradad aad u wayn in badan oo ka mid ah kuwa ku caan baxay Tacasubka Madhabnimo, Mashaa’iikhda Suufiyiinta, kuwa Khuraafaatka iyo been abuurka iyo Bidciyiinta, waxayna ku kicin jireen Caamada iyo waxmagaratada, waxayna fidin jireen in uu yahay Wahaabi Lunsan Dadkana waa uga digi jireen isaga, taasu waxay ahayd waqti ay Dacwadiisa waafaqeen Culima fadli badan oo lagu yiqiin ama caan ku ah Cilmiga iyo Diinta Magaalada Dimishiq kuwaas oo aqbalay horena ugu sii socoday Dacwadiisa waxana ka mid ahaa:Alcalaamah Bahjat Albaydar,Shiikh CabdulFataax-Iimaamkii iyo Madaxii Jamciyat Ashubaan Almuslimiin ee Suuriya,Shiikh Towfiiq Albisrah iyo qayrkood oo ahaa Ahalka Fadliga iyo Wanaaga Allaah ha u naxariisto dhamaantood

Wuxuu Shiikh Alalbaani firfircooni ka mujiyay ku hawlanantiisa Dacwadeed oo ahayd sidatan:

Fatax Almajiid- waxaa lahaa CabdulRaxmaan Binu Xasan Binu Maxamed Binu CabdulWahaab- فتح المجيد-لعبد الرحمن بن حسن بن محمد بن عبدالوهاب

Arowdah Anadiyah Sharx Adurar Albahiyah ee Showkaani-waxa sharxay Sidiiq Xasan Khaan-الروضة الندية شرح الدرر البهية للشوكاني-شرح صديق حسن خان

Usuul Alfiqihi- oo uu sharxay CabdulWahaab Khalaaf-أصول الفقة-لعبد الوهاب خلاف

Albaacis Alxasiis sharax ikhtisaar Culuum Alxadiith ee Ibnu Khathiir- waxa sharxay Shiikh Axmed Shaakir-الباعث الحثيث شرح إختصار علوم الحديث لإبن كثير-شرح الشيخ أحمد شاكر

Manhaaj Alislaam fii Alxukum- waxa sharxay Maxamed Asad- منهاج الإسلام في الحكم-لمحمد أسد

Fiqihi Asunnaha ee Seyid Saabiq-فقه السنة لسيد سابق

Horaantii Sanadkii 1960m Wuxuu ku sugnaa Shiikh Alalbaani kor ka ilaalin ay ku haysay Xukuumada Suuriya, waxaana mudan ogaansho in Shiikh uu ka fogaa Siyaasada oo aanu dhex geli jirin,ilaalintaasu waxay u keentay Shiikha carqalado badan,waxana loo taxaabay Jeelka laba goor,waxay ahayd tan kowaad ka hor 1967m wuxuuna ku xidhnaa mudo Bil ah Qalcada Dimishiq waana isla goobtii uu ku xidhnaan jiray iyada Shiikh Alislaam Ibnu Taymiyah Allaah ha u naxariistee,markii uu dhacay Dagaalkii Bariga Dhexe ee Sanadkii 1967m waxay garatay Xukuumada Suuriya inay sii dayso dhamaan Maxaabiistii Siyaasada,hase yeeshee markii uu Dagaalkii sii xoogaystay ayaa hadana mar labaad la xidhay Shiikha,laakiin markan maahayn Jeelkii Qalcada ee bal waxaa lagu xidhay Jeelka Alxaskah oo ku yaala Wooqooyi Bari Dimishiq wuxuuna Jeelka ku jiray mudo ah sideed Bilood, Wuxuuna mudadaa gudeheeda Taxqiiq ku samayay Kitaabka Mukhtasar Saxeex Muslim ee Xaafid Almundari (مختصر صحيح مسلم لحافط المنذري) wuxuuna kula kulmay halkii uu ku xidhnaa Shakhsiyado waawayn

Wuxuu lahaa Shiikhu majhuud Cilmi ah oo balaadhan iyo khidmado kala gedisan ayna ka mid ahayd:

Wuxuu yidhi Samaaxat Aliimaam Shiikh CabdulCasiis Ibnu Baas Allaah ha u naxariistee: maan ku arag Samada hoosteed Caalim Xadiith Casrigan aan joogno oo la mid ah Alcalaamah Maxamed Naasiru-Diin Alalbaani

Waxaa la waydiiyay Iimaam CabdulCasiis Xadiithka Rasuulka sala Allaahu calayhi wasalam ee ah [إن الله يبعث لهذه الأمه على رأس كل مائة سنة من يجدد لهاأمر دينها] [Allaah tacaalaa Wuxuu u soo diraa Ummadatan boqolkii Sano oo kasta cid u cusboonaysiisa Diinteeda] markaas ayaa waxaa la waydiiyay waa kuma Cusboonaysiiyaha Qarnigani? Wuxuuna yidhi Allaah ha u naxariistee: Shiikh Maxamed Naasiru-Diin Alalbaani waa Cusboonaysiiyaha Casrigan sida ay ila tahay Allaah baana og

Wuxuu yidhi Fiqhiigii Alcalaamah Iimaam Maxamed Binu Saalax Alcusaymiin isna: waxaan ka ogaaday Shiikha mararkii aan la kulmay isaga oo yarayd inuu aad isugu hawlo oo aad u ilaaliyo ku dhaqanka Sunnaha iyo la dagaalanka Bidcada, ha ahaato xaga Caqiidada ama Camalka ee, markaan aqriyayna Wuxuu Qoray ama Mu’alifaatkiisii waxaan ka ogaaday isla sidaas, wuxuuna u leeyahay Aqoon badan Xadiithka Riwaayad ahaan iyo Diraayad ahaanba, Allaah tacaalaana Wuxuu ku anfacay wixii uu qoray Dad badan xaga Cilmi ahaan iyo Manhaj ahaan iyo u jeedsashada Cilmiga Xadiithka, waxayna taasu u tahay Midha dhal wayn Muslimiinta walilaah Alxamdu, xaga se Taxqiiqaadka Cilmiga ah ee Xadiithka iyada iskaba daa

Hadalkii Shiikh CabdulCasiis Alhadih: Alcalaamah Ashanqiidi Wuxuu waynayn jiray Shiikh Alalbaani waynayn la yaab leh, hadii uu arko isaga oo dhex soconaayaa markuu Duruusta ka bixinaayo Xaramka Madaniga ah waa uu u kici jiray isaga oo salaamaaya oo qaderinaaya oo waynaynaaya

Wuxuu yidhi Shiikh Muqbil Alwaadici: waxa aan ictiqaadsanahay oo Allaah ugu Diin qabaa in uu yahay Shiikh Maxamed Naasiru-Diin Alalbaani Allaah ha xafidee uu ka mid yahay Cusboonaysiinayaasha uu ku runoobay iyaga Hadalka Rasuulka sala Allaahu calayhi wasalam ee ah: [إن الله يبعث لهذه الأمه على رأس كل مائة سنة من يجدد لها أمر دينها]

Waxaan kula dardaarmayaa Xaaskayga, Caruurtayda, Saaxiibadayda iyo mid kasta oo I jecel haday soo gaadho ama uu maqalo Geeridayda in uu Allaah ii waydiiyo oo iiga baryo Denbi dhaaf iyo naxariis ugu horayn iyo in aanay Ooyin si qayla ah oo aan Codka kor loo qaadin

Tan labaad inay dedejiyaan Aasidayda iyo in aydaan u sheegin Qaraabadayda iyo Walaalahay oo aan ahayn qadarka kaga soo aadan waajibka Diyaarintayda iyo in uu I maydho Cizat Khudur Abu Cabdullaah Jaarkayga iyo Saaxiibkayga Mukhliska ah iyo cidii uu isagu doorto ee ka caawinaysa taas

Tan saddexaad ii doora meesha ugu dhow in laygu Aaso, si aanay ugu kalifin cida Jinaasadayda qaadaysa in ay saaraan Gaadhi Dadkuna ay raacaan Gawaadhidooda iyo in uu Qabrigaygu ku yaalo Qubuuro duug ah taas oo laga yaabo in aan la baadhbaadhin

Waxaa korkiisa ah cidii joogta Beledka aan ku dhinto in aanu u sheegin cidii debediisa joogta ee ah Caruurtayda iyo qayrkoodba ilaa iyo inta lay Aasaayo, si aan taasu Caadifadah u rogin oo aanay samayn camalkeeda oo aanay taasu u noqon sabab in la raajiyo Jinaasadayda

Waxaan Allaah waydiisanayaa in aan la kulmo isaga oo ii dhaafay Denbiyaalkaygii waxaan hormarsaday iyo waxaan dib u dhigtayba

Waxaan ugu dardaarmayaa Maktabadaydii dhamaanteed ha ahaadeen wixii daabacan ama sawiran ama makhduud ah oo ah Khadkaygii iyo Khadkii qayrkayba in la siiyo Maktabada Jaamacada Islaamiga ah ee Madiinah Munawarah waayo waxaan ku leeyahay Xusuuso wanaagsan xaga Dacwada Kitaabka iyo Sunnaha iyo Manhajkii Salafkii suubanaa markaan ka ahaa Baraha halkaa, anoo Allaah ka rajaynaaya in uu ku anfaco kuwa aqrista ee wax ka barta siduu u anfacay Saaxiibkii lahaa Maalintaas Ardaydeeda, anigana igu anfaco iyaga Ikhlaaskooda iyo Ducadooda {رب أوزعنى أن أشكر نعمتك التى أنعمت على وعلى والدى وأن أعمل صالحاً ترضاه وأصلح لى في ذريتى إنى تبت إليك وإنى من المسلمين}waxay ahayd Taariikhdu 27kii Jamaad Alawal 1410h

Waxay ay Gabadh Reer Marooca ahi ugu bushaaraysay Shiikha Bushaaro aan Allaah tacaalaa ka rajaynaayo in uu dhab uga yeelo Shiikha isaga ayaa wax walba awooda ee, waxayna ahayd iyada oo ay Shiikh Golihiisa uu ka bixin jiray Duruusta uu kaga jawaabi jiray Su’aalaha ay dadku waydiiyaan Deriska dabadii ayaa waxa dhici jirtay in debedana Su’aalo laga soo waydiin jiray uu kaga jawaabo Telephone ka taas oo laga soo waydiin jiray Aduunka oo dhan, ayaa Maalin Maalmaha ka mid ah Gabadhi ka soo waydiisay Su’aalo Dalka Morocco sidii caada ahayd ayuu Shiikhu ugaga jawaabay Gabadhii Su’aalihii

Dabadeedna Gabadhii waxay u sheegtay Shiikh in ay Ri’yo ku arktay Rasuulkii calayhi salaatu wasalaam ee waxay tidhi aniga iyo Gabadh kale oo saaxiibtay ah anaga oo wada taagan meel ayaa waxaana soo hormaray Rasuulkii sala Allaahu calayhi wasalam wuxuuna noo dhaafay xagaa koonfurta markuu in yar naga sii maqnaa ayaa waxa ka daba yimid Nin, waxay tidhi Ninkaas oo sifaysay siduu u ekaa Wuxuu daba socday Rasuulka sala Allaahu calayhi wasalam Wuxuuna Cagta saaraayay Raadkii Rasuulka calayhi salaatu wasalaam ee, markaas ayaan waydiiyay saaxiibtay oo waxaan idhi Ninkaasu waa kuma? Waxayna igu tidhi saaxiibtay miyaadan garanayn waa Shiikh Alalbaani ee, Shiikhu Allaah ha u naxariistee markay Gabadhu Sheekada bilowday oo uu gartay siday u socoto ayuu Oohin la dhacay laakiin Dadkii Golaha la fadhiyay baa duubay hadalkii Gabadha iyada oo ay awelba caado ahayd oo Su’aalaha debeda laga soo waydiiyo iyo kuwa gudahaba la duubi jiray

Wuxuu geeriyooday Alcalaamah Alalbaani Maalintii Sabtida ee laba iyo labaatankii Jamaad Alaakhir Sanadkii 1420h oo waafaqsan labadii October 1999m waxaana la Aasay Salaatii Cishe ka dib, waxaana loo Aasay Shiikha si degdeg ah laba Arinood awgeed:

Iyada oo aan cidna loo sheegin Geeridii Shiikha Allaah ha u naxariistee intii ay isku dhowaayeen mooyee si ay u maamulaan diyaar garayntiisa iyo Aasidiisa iyo marka lagu daro yaraanta waqtiga u dhexeeyay Geeridii Shiikha Allaah ha u naxariistee iyo Aasidiisa ayaa hadana waxaa yimi oo ku tukaday Jinaasadii Shiikha kumanaan Dad ah iyada oo ay Dadku isu sheegayeen in Qof walbaaba gaadhsiiyo Walaalkii

Halkaas ayaa waxaa ku soo afjarantay Taariikhdii Tiir ka mid ah Tiirarka u adeega Sunnah Rasuulka sala Allaah calayhi wasalam iyo Dacwada Salafiga ee ku dhisan Manhajkii Salafkii suubanaa, Allaah tacaalaa waxaan waydiisanayn in aan noqono kuwa ka faa’iidaysta Cilmiga balaadhan ee uu nooga tegay iyo inuu nagu anfaco Aduunka iyo Aakhiroba, Ummadana ugu bedelo Tiirar kale oo halkaa ka sii wada Dacwada Xaqqa ah isagana uu u naxariisto oo gelyo Janooyinkiisa balaadhan Aamiin

Wabillaahi atowfiiq

جميع الحقوق محفوطة لموقع الإختيار أخي المسلم بإمكانك الإستفادة من محتويات الموقع في الإستخدام الشخصى ونشر الدعوة